‘नो’ नेयमार, ‘नो’ एमबाप्पे, ‘नो प्रब्लम !

काठमाडौं । फ्रेन्च लिग वान फुटबलमा पेरिस सेन्ट जर्मेन पीएसजी भन्न बित्तिकै हार नदेख्ने टिम भन्न थालिसकिएको छ । त्यहाँ प्रभावशाली र विश्वकै चर्चित दुई खेलाडीहरु ब्राजिलियन नेयमार र फ्रेन्च युवा केलियन उमबाप्पे छन् ।

तर टिमका मुख्य खेलाडीहरु नेयमार र एमबाप्पे बिना नै पीएसजीले फ्रेन्च लिग वानमा प्रभावशाली जित निकालेको छ । फ्रेन्च लिग वान अन्तर्गत शुक्रबार राति भएको खेलमा पीएसजीले सेन्ट इटिनीलाई ४–० को फराकिलो अन्तरले पराजित गरेको हो ।

पीएसजीको जितमा जुलियन ड्राक्सलर, एडिन्सन काभानी, एन्जल डि मारिया र मौसा डिवेले गोल गरे । घरेलु मैदानमा स्टार खेलाडीद्धय नेयमार र एमबाप्पेलाई विश्राम दिइएको खेलमा पीएसजीले २३औं मिनेटमा जुलियन ड्राक्सलरको गोलबाट खेलमा अग्रता बनाएको थियो ।

५१औं मिनेटमा काभानीले पेनाल्टीमार्फत गोल गर्दै २–० को अग्रता दिलाएका थिए ।

७६औं मिनेटमा डि मारियाले गोल गर्दै पीएसजीलाई फराकिलो अग्रतातर्फ अग्रसर गराएका थिए । मौसा डिवेले गोल गर्दै पीएसजीलाई ४–० को फराकिलो जित दिलाए ।

डिफेन्डिङ च्याम्पियन पीएसजीले लगातार पाँचौ जित निकाल्दै १५ अंक जोडेर यो सिजन पनि उपाधिको मुख्य दावेदारको रुपमा उभिएको छ ।