मेस्सीको करामत बार्सिलोनाको तहल्का !
काठमाडौं । स्पेनिस लिग ला लिगा फुटबलमा डिफेन्डिङ च्याम्पियन बार्सिलोनाले विजयी सुरुवात गरेको छ । बार्सिलोनाले शनिबार राति डेपोर्टिभो अलाभेसलाई ३–० ले पराजित गरेको हो ।
कप्तान लियोनेल मेस्सीले दुई गोल गरेपछि बार्सिलोनाले सहज जित दर्ता गर्न सफल भएको हो । मेस्सीले मध्यान्तरअघि प्रहार गरेको फ्रिकिक भने क्रसबारमा ठोक्किएर फर्किएको थियो ।
बार्सिलोनाले ६४ मिनेटमा बल्ल पहिलो गोल गरेको थियो । पहिलो गोल मेस्सीले नै गरे । पेनाल्टी क्षेत्रभन्दा थोरै बाहिर रहेको फ्रिकिकलाई उनले चलाखीपूर्ण तरिकाले गोलमा परिणत गरेका थिए ।
फिलिप कोउटिन्होले ८३ हौं मिनेटमा अग्रतालाई दोब्बर पारे । उनले लिगमा डेब्यु गरिरहेका आर्थरको पासमा गोल गरेका थिए । मेसीले खेलको अन्तिम मिनेटमा गोल गर्दै बार्सिलोनालाई ३ अंक दिलाए ।
प्रशिक्षक एर्नेस्टो भालभेर्डेले नयाँ खेलाडीलाई पहिलो रोजाइमा उतारेनन् । बार्सिलोना जितसहित अगाडि बढ्ने रणनीतिमै उत्रिएको हो ।
लिगको शनिबारको खेलमा भिल्लारियललाई रियाल सोसिडाडले २–१ ले हरायो ।
