फ्यान निराश गराउने गरी रोनाल्डोको विकल्प तयार

रियल मड्रिडका प्रशिक्षक जुलियन लोपेतेगीले क्लबमा स्टार स्ट्राइकर क्रिष्टियानो रोनाल्डोको ठाउँ लिने खेलाडी तय गरिसकेको स्पेनिस सञ्चारमाध्यमले दाबी गरेका छन् ।

रोनाल्डो ११२ मिलियन युरोमा इटालियन च्याम्पियन युभेन्टस गएपछि युरोपियन च्याम्पियन रियल मड्रिडमा उत्पन्न भएको खाली पूरा गर्ने खेलाडीको रुपमा रोबर्ट लेवान्डोस्की, ह्यारी केनदेखि एडिसन काभानी र इडन हजार्डलाई हेरिएको छ । यी मध्ये एकलाई क्लब भित्र्याउने रियल प्रयासरत रहेको खबर पनि आइरहेका छन् ।

तर लोपेतेगीले भने रोनाल्डोको ठाउँमा प्रयोग गर्ने खेलाडी रोजिसकेको स्पेनिस प्रशासन एएसले दाबी गरेको छ । त्यसका लागि लोपेतेगीले ९ नम्बर जर्सी लगाउने रियल मड्रिडको २१ वर्षमुनिको टिमका बोर्जा मायोरललाई रोजेको दाबी गरिएको छ ।

युवा खेलाडी मायोरलमा लोपेतेगीले विश्वास गरेको एएसले उल्लेख गरेको छ । मायोरलले गएको सिजन लोनमा वुल्फबर्गमा १९ खेलमा दुई गोल गरेका थिए । उनले रोनाल्डोले छोडेपछि उत्पन्न भएको खाली भर्न सक्ने लोपेतेगीको विश्वास छ ।

तर रियल मड्रिडका समर्थक भने क्लबको छनौटबाट त्यति खुशी रहेका छैनन् । गएको ९ वर्ष क्लबका लागि हरेक सिजन कम्तिमा ४० को हाराहारीमा गोल गरेका रोनाल्डोको ठाउँ लिन उस्तै उत्कृष्ट खेलाडी ल्याउनु पर्ने फ्यानको भनाई छ ।

मायोरल रियल मड्रिडकै उत्पादन हुन् । सन् २००७ मा रियल एकेडेमीमा आएका उनले रियल मड्रिड बी बाट ३८ खेल खेलेका छन् ।