एथ्लेटिको मड्रिडसँग रोकियो आर्सनल
युरोपा लिग फुटबलको सेमिफाइनल अन्तर्गत सेमिफाइनलको पहिलो लेगमा आर्सनल र एथ्लेटिको मड्रिडले बराबरी खेलेका छन् ।
आर्सेन वेङ्गरको टिम आर्सनलले घरेलु मैदानमा भएको खेलमा स्पेनिस क्लब एथ्लेटिको मड्रिडसँग १–१ को बराबरीमा रोकिएको हो ।
सुरुको १० मिनेटमै १० खेलाडीमा सीमित भए पनि एथ्लेटिकोले आर्सनललाई बराबरीमा रोकेको हो । १० औँ मिनेटमा सिमी वर्साल्ज्को दोहोरो पहेँलो कार्ड खाँदै मैदानबाट बाहिरिएपछि एथ्लेटिको मड्रिड १० खेलाडीमा सीमित भएको थियो ।
आर्सनलले त्यसको फाइदा लिन सकेन । पहिलो हाफमा गोल रहित बराबरी भएको खेलमा दोस्रो हाफमा दुवै तर्फबाट एक एक गोल भयो ।
६१ औँ मिनेटमा एलेक्सान्ड्र लाकाजेटीले गोल गर्दै आर्सनललाई अग्रता दिलाए । तर ८२ औँ मिनेटमा एन्टोनी ग्रिजम्यानले एथ्लेटिकोका लागि बराबरी गोल फर्काए ।
अब दोस्रो लेग आउँदो बिहीबार एथ्लेटिकोको मैदानमा हुनेछ । यो खेल वेङ्गरका लागि युरोपा लिगको फाइनलमा टिमलाई लग्ने अन्तिम मौका हुनेछ ।