विशेष महाधिवेशनबाट नेतृत्व परिवर्तन: गगन थापा
काठमाडौं/ निर्वाचनमा नराम्ररी हारेको नेपाली कांग्रेसभित्र लामो समयसम्म पनि पार्टीको आन्तरिक सुदृढीकरणको थालनी नगरिएको भन्दै नेतृत्वको चर्को आलोचना हुन थालको छ ।
पार्टीले लज्जापद हार व्यहोर्दा पनि कांग्रेस नेतृत्व मौन रहेको भन्दै केही नेताले सभापति शेरबहादुर देउवाको आलोचना थालेका हुन् ।
उनीहरुले पार्टीभित्रको गुटबन्दी अन्त्य र आन्तरिक सुदृढीकरण नहुँदा पार्टीको अवस्था कमजोर भएको भन्दै विशेष महाधिवेशनको माग गरेका छन् ।
सुदृढीकरणको गृहकार्य गर्नेभन्दा पनि सभापति देउवा एकलौटी पदाधिकारी मनोनयनमा लागेर झन् विवाद बढाएको युवा नेता गगन थापाको भनाइ छ ।
पार्टीका आन्तरिक समस्या निराकरण गर्न गम्भीर छलफल आवश्यक भएपनि सभापति देउवाले रुचि नदेखाएको युवा नेताहरुको आरोप छ ।
मनोमानी तरिकाले थिति र विधानलाई लत्याएर पार्टी सन्चालन गरेको आरोप लगाउँदै उनीहरुले अब पार्टीभित्र देउवाको विकल्प खोज्नुपर्ने बताउँछन् ।
महासमिति हुँदै विशेष महाधिवेशनबाट नेतृत्व परिवर्तन गर्नुपर्ने उनीहरुको भनाइ छ ।
पार्टी नेतृत्व गुटगत हुँदा समस्या थपिएको र पार्टीलाई सिद्धान्तविहीन बनाउँदा जनतामा पार्टीप्रति नकारात्मक दृष्टिकोण बढ्दै गएको युवा नेताहरुको भनाइ छ ।
पार्टीभित्रका असन्तुष्टिका स्वरलाई सभापति देउवाले तत्काल सम्बोधन नगरे यसले पार्टीलाई नै थप क्षति पुर्याउने कतिपयको विश्लेषण छ ।
शंकर खनाल/नवीन स्थापितले इमेज टेलिभिजनका लागी तयार गरेका छन् ।