एकताका अधिकांश विषय मिलिसक्यो : विष्णु पौडेल
बुटवल । नेकपा एमालेका उपमहासचिव विष्णुप्रसाद पौडेलले एमाले र नेकपा माओवादी केन्द्रबिच पारस्परिक सम्मान र समानताका आधारमा एकता हुने बताएका छन् ।
उनले दुई पार्टीबिचको एकताका अधिकांश विषय मिलिसकेको र केही झीनामसिना कुराले एकतामा बाधा नपुग्ने बताए । लाखौँ जनताको उपस्थितिमा एमाले र माओवादीको पार्टी एकता वैशाख ९ गते घोषणा हुनेसमेत उनले जानकारी दिए ।
प्रेस चौतारी रुपन्देहीले आज बुटवलमा आयोजना गरेको पत्रकार सम्मेलनमा उनले विगतको इतिहास, योगदान र योग्यताका आधारमा नेता र कार्यकर्तालाई जिम्मेवारी दिइने भएकाले प्रतिशतमा भागबण्डा नहुने बताए ।
माओवादी नेताहरूले ५०–५० प्रतिशतको आधारमा मात्र एकता गर्नुपर्ने तर्क अगाडि सारिरहेको प्रसङ्गमा एमाले उपमहासचिव पौडेलले भने समानताका आधारमा एकता हुने बताए र योगदान, क्षमता र सक्रियतालाई आधार बनाउँदा माओवादीको ६० र एमालेको ४० प्रतिशत पनि पर्न सक्ने स्पष्ट पारे ।
दुई पार्टी एकताका लागि सुरुदेखि पहल गर्दै आएका उपमहासचिव पौडेलले जनयुद्ध शब्दावली र निर्वाचन चिह्नको विषय पनि सहज ढङ्गले टुङ्गोमा पुगिने बताए । उनले प्रधानमन्त्री केपी शर्मा ओलीको भारत भ्रमणले दुई देशबिचको सम्बन्धमा नयाँ आयाम थप्ने बताए ।
प्रधानमन्त्री ओलीले राष्ट्रिय अनुसन्धान, राजश्व अनुसन्धान, सम्पत्ति शुद्धीकरण लगायतका निकाय आफू मातहत राखेर अधिनायकवाद लाद्न खोजेको आरोप नेपाली काँग्रेसका नेताहरूले लगाइरहेका छन् नि भन्ने जिज्ञासामा उनले अधिनायकवादको विरोधमा सधैँ लड्दै आएको पार्टी र त्यसका नेताले त्यस्तो कहिल्यै नगर्ने बताए ।
नेता पौडेलले प्रधानमन्त्री केपी शर्मा ओलीको चीन भ्रमणको निधो भई नसकेको पनि बताए ।