सुदूरपश्चिममा क्वारेन्टिनमा रहेकाहरुलाई कोरोना परीक्षण नगरिने
धनगढी – अब सुदूरपश्चिममा क्वारेन्टिनमा रहेकाहरुलाई परीक्षण नगरेरै घर पठाइने भएको छ । किट अभाव भएपछि सुदूरपश्चिममा अबदेखि परीक्षण नगरेरै घर पठाइने भएको हो ।
सुदूरपश्चिम प्रदेश स्वास्थ्य निर्देशनालयले बिहीबार जारी गरेको सूचना अनुसार प्रदेशमा कोरोना परीक्षण गर्न किट अभाव रहेकोले क्वारेन्टिनबाट परीक्षण बिनै घर पठाइने जनाएको छ ।
स्वास्थ्य निर्देशनालयले होम आइसोलेसन र होम क्वारेन्टिनमा बसेका व्यक्तिमा कुनै पनि स्वास्थ्य समस्या देखा परेमा स्थानीय स्तरमा रहेका स्वास्थ्यकर्मीले उपचार गर्ने र थप उपचार गर्नुपरेमा जिल्ला अस्पतालमा पठाउने सूचनामा उल्लेख गरिएको छ ।
स्वास्थ्य निर्देशक डा. गुणराज अवस्थीका अनुसार प्रदेशको ९ वटै जिल्लामा गरी हाल ६६ हजार व्यक्ति क्वारेन्टिनमा बसेकोले ती व्यक्तिको परीक्षण गर्न आरडिटी किट पर्याप्त छैन ।
१४ दिन क्वारेन्टिनमा बसेका नागरिकमा कुनै लक्षण नदेखिए मापदण्ड अनुसार होम क्वारेन्टिनमा पठाउन सकिने उनले बताए ।