ओली र मोदीबीच टेलिफोन वार्ता: यस्तो भयो सहमति
काठमाडौँ – प्रधानमन्त्री केपी शर्मा ओलीले आफ्ना भारतीय समकक्षी नरेन्द्र मोदीसँग टेलिफोन संवाद गरेका छन् ।
शुक्रबार भएको संवादका क्रममा कोरोना भाइरसका विरुद्धको सहकार्यलाई अझ सशक्त बनाउने विषयमा आफूहरु सहमत भएको प्रधानमन्त्री ओलीले ट्विटमार्फत जानकारी दिएका छन् ।
लकडाउनको कारण एक अर्काको मुलुकमा रोकिएका नागरिकलाई आ–आफ्नो देशमा राम्रो हेरचाह गर्ने विषयमा जोड दिइएको प्रधानमन्त्रीले उल्लेख गरेका छन् ।
आपूर्ति व्यवस्थालाई निरन्तर कायम राख्न र थप सहज र सुचारु राख्न समेत दुई प्रधानमन्त्रीबीच कुराकानी भएको छ ।
भारत सरकारले उपलब्ध गराउने औषधि लगायतको सहयोगको लागि ओलीले मोदीलाई धन्यवाद पनि दिएका छन् ।
