झन् रहस्यमय बन्दै कोरोना: सङ्क्रमितमा कुनै लक्षण नै देखिन छाडे
काठमाण्डाै– विश्वभर महामारी बनिरहेको कोरोना भाइरस झन्पछि झन् रहस्यमय बन्दै गएपछि अनुसन्धानकर्ताहरू समेत आश्चर्यमा पर्न थालेका छन् ।
पछिल्लो समय करिव ५० प्रतिशत सङ्क्रमितमा कुनै लक्षण नै देखिन छाडेको उनीहरूको दाबी छ । यसअघि एकपछि अर्को लक्षण थपिएर तनाव बनेको कोरोनाको अहिले भने लक्षण नै नदिखिने समस्या आएको छ ।
आधा जस्तो व्यक्तिमा काेराेना भाइरस (काेभिड १९) काे सङ्क्रमण भए पनि कुनै लक्षण नदेखिएकाे एक अध्ययनले देखाएपछि अनुसन्धानकर्ता समेत आश्चर्यमा परेका छन् ।
न्यु इङ्गल्याण्ड जर्नल अफ मेडिसिनमा प्रकाशित अध्ययनले लक्षण नै नदेखिएका व्यक्तिबाट कोरोनाको सङ्क्रमण फैलिरहेको देखाएको हो ।
तर लक्षण नदेखिएका मानिसबाट सङ्क्रमण फैलिन नदिन कुनै तयारी नभएको अध्ययनमा उल्लेख छ । २५ देखि ५० प्रतिशत व्यक्तिमा कोरोना सङ्क्रमण भए पनि कुनै लक्षण नदेखिएको अनुसन्धानकर्ताले बताएका छन् ।
‘कोरोना भाइरस देखिएका मध्ये २५ देखि ५० प्रतिशतमा कुनै लक्षण देखिएकाे छैन तर पनि सङ्क्रमित हुन सक्छन्’, डा एन्थाेनी फाैसीले भनिन् ।
सन् २००३ मा देखिएको सार्सको सङ्क्रमण भने बिरामी भएको सातदेखि १० दिनपछि मात्रै फैलिने गरेकाले सङ्क्रमणबाट बच्ने उपाय अपनाउन पर्याप्त समय हुने गरेको पाइएको थियो ।
तर कोरोना भाइरसको सङ्क्रमण भएका बिरामीमा लक्षण देखिनु ४८ घण्टाअघि नै सङ्क्रमण फैलिन थाल्ने भएकाले धेरैमा सङ्क्रमण भएको पाइएको अध्ययनमा उल्लेख छ ।
कोरोनाको सङ्क्रमण अहिलेसम्म विश्वका दुई सय ९ देश र दुई वटा अन्तर्राष्ट्रिय पानी जहाजमा फैलिँदा १६ लाखभन्दा धेरै सङ्क्रमित भएका छन् ।
सङ्क्रमितमध्ये तीन लाख ५६ हजार ६ सय ५५ जना उपचारपछि निको भएका छन् ।
त्यस्तै साढे ११ लाखभन्दा धेरैको उपचार भइरहेको छ भने साढे ९५ हजारभन्दा धेरैको ज्यान गएको छ ।
सबैभन्दा धेरै इटालीमा १८ हजारभन्दा धेरैको ज्यान गएको छ । यस्तै अमेरिकामा साढे १६ हजारभन्दा धेरै, स्पेनमा १५ हजारभन्दा धेरै, फ्रान्समा १२ हजारभन्दा धेरैको ज्यान गएको छ ।