रोल्पा तनावग्रस्त: अर्को बम पनि भेटियो, पुरै गाउँ शोकमा

दाङ- रोल्पामा अर्को बम पनि भेटिएको छ । जिल्लाको त्रिवेणी गाउँपालिका वडा नं- ७ गैरीगाउँको घटनास्थल अहिले सिल गरिएको छ ।

जुगार, नुवागाउँ र होलेरी इलाका प्रहरी चौकीबाट गएको प्रहरीको टोलिले घटनास्थल सिल गरेको बताइएको छ । विस्फोट नभएको बम समेत घटनास्थलमा भएकोले प्रहरीले बालबालिकाको शव उठाउन सकेको छैन ।

नेपाली सेनाको बम डिस्पोजल टोली शुक्रबार मात्रै घटनास्थल गएर नपड्किएको बम डिस्पोज गरेपछि मात्र शव उठाइने प्रहरीले जनाएको छ ।

युद्धकै समयमा छाडिएको बेवारिसे बम विस्फोट भएको आशंका प्रहरीको छ । तत्कालीन नेकपा माओवादी र शाही नेपाली सेनाबीच युद्धताका दुम्ला जंगलमा भिडन्तसमेत भएको थियो।

जंगलमा गोठालो गएका त्रिवेणि गाँउपालिका ७ का १४ वर्षीय लोकिराम डाँगी, ११ वर्षीया बिमला डाँगी, ५ वर्षीय विजय खत्री र वडा नम्बर ४ का १३ वर्षीय गौरव नेपालीको विस्फोटमा ज्यान गएको छ ।

एकै गाउँका चार बालबालिकाको मृत्यु भएपछि उनका अभिभावक र आफन्त मात्रै होइन गाउँनै शोकमा डुबेको छ ।पुरै गाउँ तनावग्रस्त बनेको बताइएको छ ।