मनिषा कोइरालाको एउटा ट्वीटले हल्लियो भारतको जग
काठमाडौं- नेपाली भुमी अतिक्रमण गरी भारतले लिपुलेकमा मानसरोबर जाने बाटो बनाएको विषयले अहिले तरङ्ग ल्याएको छ । भारतको हेपाहा प्रवृत्तिकै कारण उत्पन्न यो विवादमा अहिले भने नयाँ मोड आएको छ ।
कोरोना महामारीकै मौका छोपेर भारतले लिपुलेकमा बनाएको बाटो उद्घाटन गरेसँगै नेपालमा भारतविरोधी अभियान नै चलेको छ । यसैबीच नेपाल सरकारले भारतलाई काउन्टर दिंदै मे १ मा नयाँ राजनीतिक र प्रशासनिक नक्सा सार्वजनिक गरेको छ । नेपाल सरकारले गरेको उक्त कामको देशभर स्वागत र प्रसंशा भैरहेको छ भने भारत तनावमा छ ।
नक्सा सार्वजनिक गरेपछि अभिनेत्री मनिषा कोइरालाले लेखेको एउटा ट्वीटले भारतीय मिडियाको ‘निद हराम’ भएको छ । त्यहाँका मिडियाले आफ्नो असली रुप देखाउन थालेका छन । यतिसम्म कि कतिपय मिडियाले उनलाई गाली गलौज गर्न सम्म भ्याएका छन् । यसले के देखाउँछ भने एउटा ट्वीटले पनि भारत हल्लिन सक्छ ।
नेपालले जारी गरेको नयाँ नक्साको समर्थन गरेपछि भारतीय सञ्चारमाध्यम मात्र होइन अभिनेत्री मनिषा कोइरालाका केहि भारतीय फलोवर समेत उनीविरुद्ध खनिएका छन्। नेपालका भने उनको वाहवाही भैरहेको छ । भारतका केहि मिडियाले त यतिसम्म गरेका छन् कि उनकै ट्वीटलाई लिएर दिनभर टक शो चलाएका छन् । उनीहरूका भाषा र प्रवृत्ति हेर्दा लाग्छ विश्वयुद्ध नै सुरू भैसक्यो ।
भारतीय मिडियाको यो रवैयालाई लिएर नेपालमा चर्को आलोचना र विरोध भैरहेको छ । कतिपयले त्यहाँका मिडियालाई अल्पज्ञानी भनेका छन् भने कतिपयले दुनियाकै सबैभन्दा खराव मिडिया प्राक्टिस बताएका छन् । त्यतिमात्र होइन सामाजिक सञ्जालमा मनिषा कोइरालाको एउटा ट्वीटले भारत हल्लिएको चर्चा भैरहेको छ ।
भारतीय सञ्चारमाध्यममा कोइरालाले परराष्ट्रमन्त्री प्रदीप ज्ञावलीको ट्वीटको जवाफ दिएको विषयलाई औँल्याएका छन्। उनले उक्त ट्वीटमा नेपाल, भारत र अर्को छिमेकी मूलुक चीनबीच शान्तिपूर्ण र सम्मानजनक संवाद होस् भन्ने अपेक्षा गरेकी छन्।
ट्वीटमा उनले लेखेकी छन्, ‘हाम्रो सानो मूलुको अस्तित्व कायम राखिराख्नुभएकोमा धन्यवाद ! आगामी दिनमा हामी नेपाल, भारत र अर्को छिमेकी मूलुक चीनबिच शान्तिपूर्ण र सम्मानजनक संवाद होस् भन्ने अपेक्षा राख्छौ।’
नेपालमा जन्मिएकी कोइराला भारतीय फिल्म इन्डस्ट्रीमा एक समय राज गरेकी अभिनेत्री हुन् । केही वर्ष अगाडि उनलाई पाठेघरको क्यान्सर भएको थियो। उनले क्यान्सरलाई समेत जितेर अहिले पुरानै अवस्थामा फर्किएकी छन् ।