काठमाडौंबाट चितवन गएकी महिलामा कोरोना संक्रमण

काठमाडौं- कोरोना संक्रमण भएकी चितवनकी महिला काठमाडौंबाट चितवन पुगेको खुलेको छ । शनिबार पुष्टि भएका ९ संक्रमितमध्ये एक जना चितवनकी महिला पनि छन् ।

यसअघि चितवनमा अरु दुई जनामा कोरोनाभाइरस संक्रमण पुष्टि भएको थियो । साउदीबाट आएका युवा र उनकी आमामा कोरोनाभाइरस संक्रमण देखिएको थियो । दुवै जनाले स्वास्थ्य लाभ गरिसकेका छन् ।

चितवनको राप्ती नगरपालिका १ की २५ वर्षीया महिलामा पनि कोरोनाभाइरस संक्रमण पुष्टि भएको छ । शनिबार विहान उनको टेकुस्थित जनस्वास्थ्य प्रयोगशालामा गरिएको परीक्षणमा कोभिड १९ भएको पुष्टि भएको हो ।

यी महिला केही दिनअघि मात्र काठमाडौंबाट चितवन गएको पनि खुलेको हो । राप्ति नगरपालिकाका उपमेयर इमानसिंह लामाले दिएको जानकारीअनुसार उनी काठमाडौंमा मजदूरी गर्ने गर्थिन् । उनी केहीअघि मात्र लकडाउन सुरु भएपछि चितवन पुगेकी छिन् ।

उनको सम्पर्कमा आएका अन्यको पनि स्वाब लिएर परीक्षण गरिने जनाइएको छ ।