यसरी हुँदैछन अर्थमन्त्री खतिवडा आउट

काठमाडौं– सत्तारूढ दल नेपाल कम्युनिष्ट पार्टी (नेकपा)का नेता बामदेव गौतमलाई नेकपाले राष्ट्रियसभा सदस्य बनाउने निर्णय गरेपछि अर्थमन्त्री डा. युवराज खतिवडा आउट हुने पक्का भएको छ ।

नेकपाको बुधबार बसेको सचिवालय बैठकले नेता गौतमलाई राष्ट्रिय सभा सदस्य बनाउने निर्णय गरेको हो ।

नेकपाको यो निर्णयसँगै अर्थमन्त्रीसमेत रहेका डा. युवराज खतिवडा राष्ट्रिय सभाबाट बाहिरिने निश्चित भएको छ ।

सरकारको सिफारिसमा राष्ट्रपति विद्यादेवी भण्डारीले मनोनित गर्ने एउटा कोटामा वामदेव गौतम राष्ट्रियसभामा जाने भएका हुन् ।

गोलाप्रथाका क्रममा २ वर्षे कार्यकालका लागि चुनिएका खतिवडाको कार्यकाल यही फागुन २० मा सकिँदैछ । उनको ठाउँमा अब वामदेवले राष्ट्रियसभा सदस्यकारुपमा प्रवेश पाउनेछन् ।

पार्टीभित्रको चर्को गुटको विवादकाबीच बुधाबार नेकपा सचिवालय बैठकले बर्दियामा कांग्रेसका सञ्जय गौतमसँग पराजित वामदेवलाई राष्ट्रिय सभामा लाने औपचारिक निर्णय गरेको हो ।

वामदेव राष्ट्रियसभा प्रवेश गर्ने भएसँगै अर्थमन्त्री खतिवडा अब राष्ट्रिय सभा सदस्य रहने छैनन् । राष्ट्रियसभाको कार्यकाल सकिएको ६ महिनासम्म खतिवडा अर्थमन्त्री रहन पाउनेछन् । तर त्यस पदमा रहने नरहने अर्थमन्त्री खतिवडाले आफुले नै निर्णय लिनेछन् ।