कृषि सचिवबाट राजिनामा दिएर राष्ट्रसंघमा जाँदै युवकध्वज जिसी
काठमाडौं- कृषि मन्त्रालयका सचिव डा.युवकध्वज जिसीले राजिनामा दिने भएका छन् ।
जिसी संयुक्त राष्ट्रसंघअन्तर्गतको विश्व खाद्य कार्यक्रममा जागिर खानको लागि राजीनामा दिने तयारीमा रहेको बताइएको छ ।
स्विट्जरल्याण्डबाट विद्यावारिधि गरेका जिसी विश्व खाद्य कार्यक्रमको आग्रहमा जिसी बैंकक जान लागेको स्रोतले दाबी गरेको छ ।
डा. जिसी ‘खाद्य तथा पोषण सुरक्षा’ सम्बन्धी विज्ञ हुन् । पोषणयुक्त खाद्य सम्बन्धी अन्तर्रा्ष्ट्रिय गोष्ठीमा समेत उनले धेरै पटक भाग लिईसकेका छन् ।
सचिवको हैसियतमा उनले दीगो विकास लक्ष्य हासिल हुनेगरी गरिबी निवारण गर्न र षोषणयुक्त खाद्य बस्तु उत्पादनमा विशेष भूमिका निर्वाह गरेका थिए ।
विश्व खाद्य कार्यक्रमको लागि बैंककमा बसेर रिजनल प्रमुखको जिम्मेवारी सम्हाल्नको लागि आएको अवसरलाई खेर फाल्न नहुने सुझाव आएपछि उनी बैंककतर्फ प्रस्थान् गर्ने तयारीमा जुटेका छन् ।
‘सम्भवतः उहाँले सचिवबाट छिट्टै राजीनामा दिनुहुनेछ’–मन्त्रालय स्रोतले भन्यो,‘उहाँ बैंकक जाने अन्तिम तयारीमा जुटिसक्नुभएको छ ।’
जिसीको कार्यशैलीलाई मन्त्रालयका सबै कर्मचारीहरुले मन पराएका छन् । कतिसम्म भने उनी सचिव हुँदो धेरै सरकार फेरबदल भए ।
यो बीचमा धेरै मन्त्रीहरु पनि नयाँ आए । तर, उनलाई भने कसैले पनि सरुवा गर्न चाहेनन् । कारण उनको कार्यशैली हो ।