दानबहादुर मल्ललाई जिल्ला छाड्न १२ घण्टाको अल्टिमेटम
चितवन- एसपी दानबहादुर मल्ललाई चितवन जिल्ला छाड्न १२ घण्टाको अल्टिमेटम दिइएको छ ।
सरुवा भएको दुई हप्ता बितिसक्दा समेत चितवनका प्रहरी उपरीक्षक (एसपी) दानबहादुर मल्लले जिल्ला छाड्न अटेर गरेपछि प्रदेश प्रहरीले १२ घण्टे अल्टिमेटम दिएको हो ।
सरुवा भइसकेका एसपी दानबहादुर मल्ललाई १२ घण्टाभित्र बुझबुझारथ गर्दै जिल्ला छाड्न प्रदेश–३ प्रहरी कार्यालयले निर्देशन दिएको हो ।
प्रदेशले बुधबार दिएको गोप्य सर्कुलर पत्र नै एसपी मल्लले बिहीबार सुरक्षाकर्मीहरुको सामुहिक सामाजिक सञ्जाल हालेका छन् ।
प्रदेश प्रहरीका एसपी अरुण पौडेलले हस्ताक्षर गरेको पत्र संख्या नम्बर ८१०४ रहेको पत्रमा डीएसपीलाई चार्ज बुझाएर तत्काल त्यसको जानकारी मातहतलाई गराउन उल्लेख छ ।
प्रहरी प्रधान कार्यालयले पुस ४ गते एसपी मल्लसहित २४ एसपीको सरूवा गरेको थियो । चितवनमा एसपी गंगा पन्तको सरूवा भएको छ ।
