ओली -प्रचण्ड वार्ता :अध्यक्ष वा प्रधानमन्त्री एक नछाड्ने प्रचण्डको अडान - Himal Post Himal Post
  • ६ चैत्र २०८०, मंगलवार
  •      Tue Mar 19 2024
Logo

ओली -प्रचण्ड वार्ता :अध्यक्ष वा प्रधानमन्त्री एक नछाड्ने प्रचण्डको अडान



काठमाडौं। नेकपा एमालेका अध्यक्ष केपी शर्मा ओलीसँगको भेटमा नेकपा माओवादी केन्द्रका अध्यक्ष पुष्प कमल दाहालले आफूहरुबीच भएको पूर्व सहमति अनुसार शक्ति बाँडफाँडमा आफ्नो अडान कायम राखेका छन् । शुक्रबार दिउँसो दुई नेताहरुबीच भएको वार्ताका क्रममा अध्यक्ष प्रचण्डले पूर्व सहमति अनुसार पार्टी अध्यक्ष वा प्रधानमन्त्री मध्ये एक कार्यकारी पद आफूले पाउनु पर्ने अडान दोहोर्याएको स्रोतले जानकारी दिएको छ । उनीहरुबीच वार्ता सकिएपछि राष्ट्रपतिसँग पनि वार्तामा भएका कुराकानी सुनाउने सहमति भएको छ ।

लामो समय पछिको भेटका क्रममा राष्ट्रिय सभा गठन र राष्ट्रपतिकहाँ पुगेको सो सम्बन्धी अध्यादेशको विषयमा कसरी अघि बढ्ने भन्ने विषयमा छलफल समेत भएको प्रचण्डको निजी सचिवालयले जनाएको छ । शुक्रबार विहान मात्रै एमालेमा ओली निकट मानिने महासचिव ईश्वर पोखरेलले सार्वजनिक कार्यक्रममा ओलीले प्रधानमन्त्री र पार्टी अध्यक्ष ओली नै बन्नुपर्ने बताएपछि भएको दुई अध्यक्षहरुको भेटलाई महत्वपूर्ण रुपमा लिईएको छ ।

तुरुन्तै दुई पार्टीबीच एकीकरण गर्ने सहमति गरेका यी दुई पार्टीअध्यक्षहरुबीच लामो समयपछि भएको भेटका क्रममा शक्ति बाँडफाँड, सत्ता साझेदारी र पार्टी एकीकरणको बारेमा पूर्ण तयारी सहित छलफल भएको माओवादी केन्द्रका एक नेताले जानकारी दिए ।

शुक्रबार दिउँसो भेटपछि प्रचण्डको सचिवालयले छलफलमा नयाँ सरकार गठन, पार्टी एकता प्रकिया, राष्ट्रिय सभाको गठन र समसामयिक राजनीतिक विषयमा केन्द्रित रहेर छलफल भएको उल्लेख गरेको छ । अध्यक्ष प्रचण्ड र ओलीबीच भएको छलफलमा प्रतिनिधि सभा र प्रदेश सभा सदस्य निर्वाचन सफलतापूर्वक सम्पन्न भएको र कम्युनिष्ट गठबन्धन परिणाममूखी भएको निष्कर्ष पनि निकालिएको जनाएको छ।